De Vastelaovend is dit jaor toch weer angers es angers. Maar neet in Neel. Dit jaor touvere veer heel Neel om toet ein vastelaovesdörp. Versier dien hoes en tuin in de mooie kleure van de vastelaovend. ’t Hoes det ’t sjoonste versierd is, kint ein pries winne tiedes de puzzelspeurtoch op vastelaoveszunjig 27 fibberwari.
Gein versiering? Gein probleem! Doe kins ein vlag of vaan koupe biej Boekhuis De kleine tovenaar, Plus Rutjens en bie Eiermarkt 18
Doot mit mit de Enige Echte Neelder Vastelaoveszunjig-Toch!
Neel zou Neel neet zeen es v’r op vastelaoveszunjig gein vastelaovesactiviteit zoude höbbe. Loup op zunjig 27 fibberwari tusse 11:11 en 15:11 oer de Enige Echte Neelder Vastelaoveszunjig-Toch. Ein puzzelsjpeurtoch veur jónk en aad!
Hoezer en tuine zeen versierd in Neel in de sjoon kleure van de vastelaovend. Op ein aantal plekke is ein puzzelsjtukske versjtop. Loup de route, maak de puzzel en win ein sjoone pries! En óngerwaeg… is d’r vas hiej en dao ein verrassing.
Deilname is graties.
Ophaole van de puzzelsjpeurtoch kint op zunjig 27 fibberwari van 11:11 toet 15:11 in de Raodhoessjtraot. Doe kins de route ouch vanoet hoes loupe, download dan de route zellef. Dit kint vanaaf 26 fibberwari om 19:00 oer via deze website. Let op! De puzzelsjpeurtoch mot op zunjig 27 fibberwari veur 15:11 oer ingeleverd zeen in de stand in de Raodhoessjtraot (biej de kirk).
Neel kleurt rood, gael en greun! Welk hoes vinjs doe ’t sjoonst versierd? Gaef dit aan op ’t formulier van de puzzelsjpeurtoch en de winnaar ontvingk ein leuke pries!
Veer winse ederein väöl plezeer!
