Derde editie van De Gemaskerde Zenger: de jach op mysterieus Neelder talent
Nao ’t succes van 2023 en 2024 kömp d’r in 2025 ‘n nuje editie van De Gemaskerde Zenger. Op zaoterdig 25 jannewari moog g’r neet ontbraeke bie de derde editie wo ederein vol sjpanning oetkiek nao welke Neelder oet ’t kostuum en van achter ’t maske teveursjien komme.
Ederein wèt det tösse al die Ketjes en Katers in Neel sjtiekem heel get zang- en acteertalent róndjlöp. Die kinne serieus mauwe, ech geine kattepis! Op zaoterdig 25 jannewari kump det allemaol nao boete oppe buun van ‘t Katerpelies, Kefee-Zaal De Sjter aan de Raodhoessjtraot 13 in Neel.
’ne Jach op mysterieus talent van bekinde en onbekinde Neelder luuj, gemaskerd en verkleid in prachtige kostuums. En geer zeet de jury! Waem haet de bèste sjtum, waem maak de bèste show, waem wèt de zaal de betouvere en de herte van ’t publiek te winne? Kóm kieke en loestere nao De Gemaskerder Zenger van Neel!
’t Waert ‘ne sjpannende aafvalrace wo sjtök veur sjtök de maskes valle toetdet allein de allerbèste zenger of zengeres euverblief. De zaal zal waere opgewermd door de DJ, ’t fees waert compleet gemaakt mit ’ne sjpetterend optraeje van nemus minder es de Roerdassen en netuurlik door ózze eigese Prinsekepel Neel.
De zaal geit aope óm 20:00 oer.
