Ceryll Aubert is de meer dan terechte winnaer van de KUUL 2023. Hae waas de bèste van veerteen inzendinge oet Neel en gans Remunj. Op ‘t lest bleve drie finaliste euver: Hel & d’r Naeve en Mick & ziene Aje.
Ceryll is es muzikale doezjendpoot al jaore actief in Remunj en haet noe ziene waal verdeende erkenning gekrege. Ceryll zaet zelf:
‘Geweldig om hie te moge winne. Doe duis eigelik mit veur de gezelligheid, maar zeker dit publiek maak ‘t geweldig om hie op te moge traeje. Ich kiek enorm oet nao ‘t optraeje op de 11e van de 11e in Remunj en de Vastelaoves Villaasj in Neel. Ech ‘ne druim dae oetkump.’
