Waem waert de nuje Katerprins?
Eindelik kint de nuje Prins zich laote kieke op 12 jannewarie in Zaal de Ster
De jeugvastelaovend is al op gang gekomme, mer noe is het de beurt aan de “grote” Prins. Veurdet ‘t echter zover is, zal eers Prins Olaf I aaftraeje. Same mit zien adjudante Guido en Kevin zal hae nog eíne keer truukkieke op ‘t aafgelaupe sezoen. Zal ouch hae waere opgenaome in SJNAPS? Veer kinne nieks belaove, mer ver dinke van waal!
Nao dees sirrejeuze hanjelinge, zalle de zenuwe op de buhne toet ein hoogtepunt gaon kómme. Nog aeve nagelbiete en ‘t zjwiege kin waere doorbraoke. De omerta haet zien werk gedaon en veer höbbe de naam van de nuje nog neet geheurd. Haaj óze Facebookpagina en de website in de gaate veur de sjnabbeltjes. Dao gaon veer ein paar sjone hints gaeve!
Det wilsse toch neet misse? De meziek zal dae aovend waere verzorg door o.a. Björn en Mieke, Henk en Ton en DJ Cropy. De Prinse-kepel is al wermgedreijd en zal d’r veur zorge det de nuje zich metein in ’t zjweit zal werke.
Kóm daoróm allemaol op de volgende datum nao Zaal de Ster: zaoterdig 12 jannewarie om 20.11u!
KlassjeNeel.
De daag nao ut oetrope zal de nuje Prins, same mit zien adjudante, leeje van de Raod van Ellef, de Prinse-kepel en de Jeug van de Katers, de verkaup van de nuje KlassjeNeel verzorge. Dees prachtige Vastelaoves-gezet zal op zondigmorge 13 jannewarie vanaaf 10.30 oer in Neel hoes-aan-hoes veur de pries van € 5,- te kaup waere aangebaoje. Zit geer lid van VV De Katers, dan krieg geer de KlassjeNeel gratis en veur nieks. Vanaaf maondig 14 jannewarie is de KlassjeNeel ouch te kaup biej de Primera, Baekwaeg te Neel en biej Bookwinkel “de kleine Tovenaar” op de Hoekstraat.
