Prins Rob II

Ich heur ‘t en ich zeen ‘t uch dinke; is dae van Aolemans van Neel?? Jaozeker!! En ‘t Neelse zit nog deper in mich den det geer dinkt. De opa van mien vader Frans, dae is in 1924 Cafe Zaal Cox begós, de Kefee die noe ‘t Dörp hèt. De opa en oma van mien moder Els, kómme van de Pastoor Ramaekerstraot aaf. Verdere teks en oetligk laes geer hiej ónger;

Zo is ‘t geloupe;

‘t Waas dónderdig 11 juli van ‘t aafgeloupe jaor óm 21.37 oer. Zo es geer mesjiens zólt weite, bön ich hovenier, sins inkele jaore werkzaam bie Boesheide es werkveurbereijer/ óntwerper. Eigelik geweun de sjakel tösse binne en boete. Dae bewuste aovend zoot ich same mit miene baas Ronald (vors van de Nachtegale) de letste offertes en euverig pepierwerk weg te werke, want mien plenning woor om de waek d’r op op fekansie te gaon. Óm 21:37 kreeg ich ‘n eppke op miene tillefoon van Eric Obstals mit de vraog: Rob, op welk nummer kin ich dich bereike? Of mósse morge vreug op? Dao woor mien antjwaord op: esse veur ‘t werk get gedaon wils höbbe, mósse op ‘t anger nummer belle, is ‘t ein privé kwestie, den zit se good. Al mit al ginge d’r get eppkes euver en weer toen oeteindelik gebeld waerde mit DE vraog. Waat dachs dich d’rvan óm in 2020 de veurgenger van de Katers te waere……

Eerste gedachtegank? Prachtig, sjiek, jaozeker gaon v’r doon. Mer ‘t antjwaord woor… Jao, det vinj ich sjoon desse aan mich höbs gedach, same mit de angere here van de prinskeuzekemissie, mer ich zal ‘t toes toch eers ins mótte euverlegke. Twee kinjer en eine pup. Dao zal ich toch get veur mótte regele. Ronald zoot taege euver mich en wis net zo wie mich, neet ech waat um ‘aan de pens’ woor. Eers ins ein 10 menute mit hem zitte bakkeleije, in de tössetied mien vrouw Miriam ein eppke gesjtuurd mit de teks, veer mótte dalik ins aeve kalle sjat. Al mit al wore veer ein half oer wiejer toen pap belde en vroog,;”en jóng? Nog sjteeds aan de gang?” Wo ich vriej mekkelik op kós antjwaorde, zo van: “nou, veer zeen al ein klein 20 menute nieks aan ‘t doon, want ze höbbe mich net gebeld vanoet Neel”. Ouch dao woor de rejaksie sjoon óm te heure. D’rnao nao Herkebos haer en toen keek Miriam mich aan en zei, ech? Seriejeus? Nao ein oer kalle en al geliek ‘t program oppe meel te höbbe sjtaon, eers mer ins ein nach good d’r euver sjlaope.

Vriedigaovend pap en mam toes, agenda oppe taofel en kieke waat waal en neet haolbaar is mit lozjere van de kinjer en de hóndj. Al gauw woor ‘t geweun dudelik. Wie den ouch, veer gaon det regele!!!  Toen waerde de tillefoon gepak en gebeld mit ‘t definitieve antjwaord. “JAO, ich waer gaer uche veurgenger in Neel”.

Den geit ‘t beginne, invölling gaeve en det begint mit ‘t keze van adjudante, want zón Prinssjap duisse neet allein. Det höb ich bie de Zolderratte in Azerao waal gemerk wie ich dao jeugprins woor. Daoróm woor ‘t veur mich heel dudelik. Dae waat mich toen det sezoen d’rdoorhaer haet getrokke, wil ich d’r dit keer ouch weer biej höbbe. Roger, vrundj vanaaf de brugklas, getuge van mich, en ich van hem, wie veer trouwde. Sjmorges vreug, óm 6:30 vertrokke veer zoget geliek nao ‘t werk toe. (hae woont twee hoezer van mich aaf). ‘t Waas zo det Roger zich nog efkes mós ómdreije óm nog get te pakke. Toen reej ich ‘m klem, keek ‘m aan en zag: “Poohman, jóng, ‘t is zowied”. Hae kiek mich aan, lach en zaet, “seriejeus??  Den gaon v’r ‘t doon, dit wil ich mitmake!” Yes, de eerste in the pocket dach ich.

D’rnao oppe zaak ein tas kóffie gedrónke, daonao gaon kieke nao ein loupend projek, want ja, ‘t werk geit door! Wie ich daohaer op waeg waas, dach ich, wets se? Ich bel Kevin op, kieke waat hae zaet. Kevin, mede-trómmeleer bie Urbanus en lid van de Rebelleklup . Wie hae nog ein klein menneke woor deej ich op ‘m oppasse. Zien rejaksie? Nou, heel eerlik? Hae meinde eers det ich hem veur de gek deej haje. Nog zón gevalletje van “waat is mich aan ‘t lief”. Mer hae zag waal geliek:”jaozeker doon ich det, sjiek”.

Toen woor de derde adjudant aan de beurt. Cleem, aad prins, sjnap ‘t sjpeel, veer kinne ós al zeker 15 jaor, de man mit de hamburgers van de Mc tiedes de optoch in Remunj. Nao get eppkes op en aaf, woor ‘t antjwaord al vriej sjnel: jao! Belle kós neet, ómdet d’r op Bospop woor en mich den toch neet heurde, dus den mer zo.

Noe zeen veer mit z’n vere, twee aad adjudante en twee aad prinse. ‘t Kwartet is kómpleet.

 

Noe dan ‘t gedeilte det ich mich aeve veursjtel:

Miene naam is zoals geer weit Rob, zoon van Frans en Els Aolemans. Gebaore en getaoge op ‘t Neelse deil van ‘t Maolbrook. Es klein menke bön ich nao basissjool de Sjakel gegange en bön in groep 1 biej jufrouw Heleen terecht gekómme, vanoet de Basissjool bön ich ein jaor nao de Broekhin gegange aan de randj van Neel. ‘t Jaor dao-op ging ich nao de angere kantj van Neel haer, namelik nao ‘t toenmaolige AOC limburg oppe Jagersjtraot óm dao get meer mit de henj  te doon. Wie ich dao ‘t diploma behaolde ging ich op diezellefde sjool verder óm door te lere veur hovenier. Wie ich det oeteindelik ouch haolde ging ich ‘t letste deil van mien opleijing in Haerle volge. Daonao woor ich klaor, tied óm te gaon werke.

Tiedes mien opleijing en wie ich de sjool aaf haaj bön ich bie Nico Cox begós mit werke (aad raodslid van de Katers). In dees periejode bön ich ouch begós mit ‘t traktor-rieje (Prinse-wage trekke) mit de optochte in Neel en Remunj. Ómdet dees destieds bie Nico gestald sjtinge. Naodet ich ein kleine 10 jaor bie Nico had gewerkt, ging ich bie ein groot greun bedrief werke, namelik Donker Groen. Dao höb ich 4 jaor gewerk en bön ich weggegange ómdet miene rögk ‘t zjwaore beroep neet meer aankós. Vanaaf dae tied zit ich bie Boesheide es sjakel tösse binne en boete en werkveurbereijer.

Es Neelse jóng en echte Aolemans bön ich in Neel bie de sjötterie gegange wie ich 7 jaor woor. Begós mit trómmele baove bie Kefee de Sjter, ‘t jaor dao-op de buks oppe nek, waal mit get hulp. Noe 26 jaor later, nog sjteeds lid van Urbanus en höb ich ‘t gelök gehad det ich bie ‘t OLS zestal zoot es 6de sjöt.

Veur de Neelder vastelaovesvereniging höb ich ins eine keer mitgedaon aan de Bóntje Aovende en noe, al mit al, 14 jaor de Prinse-wages gereje en d’rnao det ouch deils mit moge regele. Nao al dees jaore kin ich dit jaor weer zegke, ouch dit jaor trek ich de ker. Allein den zónger traktor.

Es hobbie höb ich whisky en den mit name de Sjotse whisky. De belaeving,  ‘t proses van ‘t toet sjtandj kómme, de versjillende sjmake en alles waat d’r nog bie heurt. En den daobiej nog ‘t geheimzinnige van Sjotlandj zellef, maakt det ‘t veur mich ein drenkske mit beteikenis en geveul, det is neet te besjrieve, det mósse preuve.

In ‘t wiekend pakke veer ós gaer de old-timer en trekke veer richting ‘t zuje veur dao van ‘t prachtige Limburgse heuvellandj te genete, picknickmanj en daeke mit, tössedoor örges sjtoppe, genete van ‘t mement mit ‘t gezin.

Tot sjlot nog ‘t volgende, sins teen jaor woon ich in Herkebosch (kleine Kölle) same mit mien vrouw Miriam en ós 2 kinjer  Coen en Jana. Ós gezin is nog wiejer oetgebreid mit eine Kater genaamd Sammie en oze hóndj Elvis.

Ich haop det geer mit baovesjtaonde eine indrök höb gekrege, waem dit sezoen de veurgenger van de Katers moog zeen. Dit wil ich same mit mien adjudante en de Raod van Ellef gaon doon ónger de liefspreuk:

 

SJÖD IN EN MAAK ’T MIT!

 

Profiel van Prins ROB II
Woonplaats: Herkenbosch
Laeftied: 3×11
Gewich: Meistal tösse de 78 en 81 kilo
Getrouwd: Jao, op 27 jannewari 2012
Sjterrebeeld: Ram
Opleijing: Hoveniersopleijing op ‘t Cita Verde in Remunj oppe Jagerstraot en d’rnao nog aeve in Haerle
Waat bös se gewaore: Werkveurbereijer bie Boesheide
Waat wól se vreuger waere: Verkesboer of get mit traktors
Vereniging: St Urbanus Maasneel en SVH’39
Waat zól se aan dien oeterlik wille verangere: Es ich ‘t zo kin haje vinj ich ‘t waal prima
Hobbies: Sjete, whisky en gaon toere mit de kaever
Sjportief hoogtepuntj: Perseunlijk kampiejoen van beide Limburge en netuurlijk ‘t winne van ‘t OLS
Sjportief deeptepuntj: Mien ganse voetbalkarriejaere bie RKAVC
Hoesdere: Elvis oze franse bulldog en Sammie oze Kater
Lets gekochte SeeDee: CD? Bön meer van vinyl, mer es ich ‘t good höb Led Zeppelin van Led Zeppelin
Waat dink se veur de sjpegel: Jóng, waat liek se toch op dien moder
Favoriet fekansielandj: Italie
Favoriete drank: Whisky, waal Sjotse
TeeVee Program: Haaj ‘t mer op Netflix, dao is altied get op
Wo kinne ze dich midde in de nach veur wakker make: Gehakbelkes in tomatesaus mit friet van mam
Bang veur: Leon Hamans wie d’r nog in funksie woor
Ich druim döks van: Zól ‘t neet weite, den sjlaop ich meistal
Beste eigesjap: Sosjaal
Sjlechte eigesjap: Weinig toet gein gedöld
Höb resjpek veur: Mien eljers en veur luuj die resjpek veur mich höbbe
Höb ein haekel aan: Ónrech en luuj die zich drök make óm zjwarte Piet
Mót lache óm: Sjaele zeiver en sjtómme kal
Vrunjsjap is: Op de memente det ‘t d’r toe duit dao zeen
Waat is belangriek veur dich: Mien vrouw Miriam en mien kinjer Coen en Jana
Waat zól se doon mit ein miljoen of meer: Investere in get leuks, mer eers mit de femilie Aolemans oetaete
Sóms dink ich… Neet te bang…..