Jeugprins Loewieke I

Hiej bön ich dan!!!

Hallou allemaol, eindelik moog ich mich dan veursjtelle.

Ich bön Loewieke van Cruchten gebäöre op 20-06-2008 en op ’t mement 1 x 11 jaor aad. Ich bön ’t veerde kindj en tweede zoon van aad prins Raoul I (1997) en aad Neelder meun Angelique. (2006)

Ich woon oppe Marijkelaan 16 in Neel same mit mien ajere  zus Josje, aad Kater jeugprins Pieter-Raoul I (2015) en netuurlik mien pap en mam. Mien aajste zus Shirley woont same mit häöre vrundj Ruud en dochtertje Diana in Drute. Mien opleijing doon ich op bs sjool Leeve in ’t Tuinhagedisseriek.

Waat waas ich bliej det ich eindelik gevraog waerde…….. Vanaaf ’t mement det Hans Metten mich de raodsmuts op zat, wie ich nog neet kós loupe, druimde ich al óm jeugprins biej de Katers te waere. In 2012 höb ich al ins moge oefene biej kinjerdaagverblief Keet in de Kerk, same mit prinses Noa,  Mit oze sjpreuk:

Dit jaor is de vastelaovend kompleet, mit ein Katerprinsepaar biej Keet.

Eine sjpreuk dae ich noe nog neet kin ónthaje, laot sjtaon wie ich 3 jaor aad waas. Twee jaor later moch ich weer prins waere, maar noe op bs Leeve same mit mien grote broor  Pieter-Raoul. Ich in groep 2 en Pieter-Raoul zoot toen in groep 8.  (Dae had de haop Kater jeugprins te waere al opgegaeve). Toen waas miene liefsjpreuk: Paaf Alaaf, waat ein sjtök mekkeliker waas te ónthaje.

‘t Jaor daonao waerde mien grote broor jeugprins bie de Katers. Zónger ouch mer get te weite waerde ich dao zo mer in ins reserve adjudant. Ich kós neet geluive waat mich dao gebeurde. En noe moog ich zellef.

D’r waert waal ins gezag 3 x is sjeepsrech .

Ich bön dan ouch de daag aaf aan ’t telle toet de grote daag op 5 jannewarie 2020, en op ’t mement det ich dit sjrief is ’t pas begin november…. pfffff det doert nog lang……..veur ich de Katerjeug veur moog gaon.

In jannewarie kin ich dan waal aansjloete in ’t femilie riejke van prinse ,want geer mót weite, miene opa en al mien ooms aan mam ziene kantj plus miene pap en broor  zeen biej versjillende vereniginge prins gewaes. Yes !! Ich heur d’r noe ouch biej.

Maar det is neet gek, in dees femilie perbere veer  aan alles mit te doon  waat d’r maar te belaeve is. Mien aajste zus Shirley zoot biej de begleijng van de jeug, en duit nog eder jaor zien sjteinke biedrage aan de Kinjer Bóntje Middig.

Josje, mien angere zus haet veural väöl gezónge, en haet mitgedaon aan versjillende  leedjesmiddige in Neel en ouch aan ‘t KVL.

Pieter-Raoul  is jeugprins gewaes, sjpraeksjtalmeister biej de jeug  en det haet hae noe ómgeruuld door mit nog get anger jónges de 717 feesjes te organisere. En det alles in ós eige Neel.

Mien mam die duit mit nog ein paar anger mama’s de vrouwluujzitting organisere en miene pap hilt zich bezig mit Sjnaps, de Kinjer Bóntje Middig en nog väöl en väöl meer.

Ich zellef  vinj meziek make mit mien träöt geweldig leuk ……..veural mit de vastelaovend same mit de JPK. Aafgeloupe jaor moch ich mit de grote PK mit blaoze en Max Schrader haet mich dao biej geholpe. Det waas op de grote resepsie van D’n Uul en de Kaketoe’s. Waat ein ervaring, ich krieg ’t d’r nog werm van. En mit “Van Alles Get” sjtinge veer veurig jaor zellefs in de finale van ’t KVL. KVL sjteit veur : Kinjer Vastelaovend Leedjesfestival wo veer 4de waerde,  det waas sjpannend.

In Van Alles Get zit dan ouch ein van mien adjudantes, waat nog väöl sjpannender waas…………Want zól ’t waal moge van de grote veurzitters. ’t Is namelik ein ech Neels maedje mit de naam Isa Vorage.  ’t Zal dan ouch de gesjiedenis in gaon es eerste maedje waat bie Katers  dees rol moog vervulle. Isa is ein ech vastelaovesbees, det haet ’t van toes oet mit gekrege .

Same mit mien vrunj ein belke trappe doon ich gaer, veer voetballe biej SVC 2000 in Neel. Aafgeloupe jaor zeen veer zellefs kampiejoen gewaore en noe voetbal ich in de JO 12-1. Det doon ich same mit dae angere adjudant van mich en dae haet aafgeloupe jaor al ein bietje moge proofdreije , want det is de zoon van bienao aad prins Robin I (2019). Det is Chris de Groot, dus det kump waal good mit dem.

Op ’t mement det geer dit laes is Robin al aad -Prins Robin I, det wilt dus zegke det ’t jeugprinse trio dit jaor, drie aad prinse van de Katers  es pap höbbe ……det belaof get.

Verder wil ich uch nog vertelle det ich spesjaal veur dees rol mien haor höb aaf laote knippe, ómdet Marcel (det is de veurzitter van de jeug-kemmissie) altied zag: “es se de haor aaf knips, waer se jeugprins”.

Nou, hae haet waord gehaje en hiej bön ich dan.

Es geer de Kater-site in de gate zólt haje, kin ’t zeen, det d’r waal ins ein fillemke veurbiej kump, zodet geer ein bietje mit kint make waat veur eine sjone tied ich belaef hiej in Neel en ómsjtreke.

Ich bön hersjtikke sjtols d’r op det ich uch dit jaor veur moog gaon en haop der same mit mien adjudante eine kei sjone vastelaovend van te make ónger miene liefsjpreuk :

NEET DINKE MAAR DOON

Profiel Jeugprins Loewieke I

Woonplaats  Neel
Laeftied 1x11jaor
Gewich lever te diek in de kis den ein feesje gemis
Lingte 11×14 cm
Sjoonmaot 38
Sjterrebeeld twee van de zellefde
Opleijing bassissjool
Waat wólse later waere grote prins
Femilietrekskes nieks wille misse
Diene biejnaam Lodewijk
Vereniging de Katers, SVC2000 en de fanfaar
Hobbies voetballe, game, zjwumme en nog väöl meer
Hoesdere jao, sjpinne in de kelder
Ut lekkerste aete pizza en de frietkraom
Ut neet lekkerste aete zoervleis
Favoriete drank ice tea
Favoriet fekansielandj Neelderlandj
Sjoonste TeeVee Programma de voice
Sjoonste Meziek rep- en vastelaoves meziek netuurlik
Sjoonste vastelaovesleed nao t zuuje gaon
Bang veur oos hoesdere in de kelder
Ich druim döks van Jeugprins en profvoetballer waere
Beste eigesjap kin good loestere
Sjlechte eigesjap ich loester neet altied
Höb resjpek veur mien femilie
Höb ein haekel aan toetse op sjool en wachte
Mót lache óm Jeroen van Koningsbrugge, in “ich haaj van Holland”
Ich erger mich waal ins aan mien broor
Waat winse dich Voetballe biej Feyenoord 1
Waat wilse nog ins euverdoon voetbaltoernooj in de Koel maar dan ’t leefs de Koel omruile veur de KUIP
Vastelaovend is…? Fantasties
Waat waas dien rejaksie wie se gevraog waerdes om dees  funksie te vervulle ich dach eindelik, en wie ’t kwartje veel mós ich bäöke van bliejsjap det ze mich neet vergaete ware