Jeugprins Rens I

Efkes Veursjtelle:

Jeugdprins Rens I

Hallou allemaol, miene naam is Rens Beurskens en ich bön dit jaor de nuje veurgenger van de Neelder jeug-vastelaovend. Ich bön ein keer 11 jaor (bienao 12 jaor). Gebaore oppe Breijewaeg en woon noe tiedelijk oppe Gebroeklaan. Pap en mam mótte zo neudig ein sjtök van ‘t aje klooster koupe en det mót nog verboewd waere. Ich höb ein breurke Raf, veer kinne neet mit en neet zónger mekaar. Vastelaovend is mich mit de paplaepel ingegaeve; ‘t zit mich in mien blood!

Miene pap kump oet de sjtad en is eine echte Uul. Hij kwaam mien mam taege, die ein ech Neelder maedje is, haet euver zien hert gesjtreke en is in Neel kómme wone. Miene pap zit in het besjtuur van SVC 2000 en duit dao vanalles óm de miense geldj oet de tesse te kloppe.

Mien mam is ein echt Neelder maedje. Gebaore en getaoge oppe Elmpterwaeg. De ome van mien mam, Peter Maessen, dae helaas neet meer ónger ós is, en ziene zoon Clemens Maessen, zeen allebei veurgenger gewaes bie de Katers. Peter waas ouch nog Vors biej de Katers. De pap van mien mam, miene opa Frits dus, zoot vreuger bie de Hopsjlokkers oet Sjwaame. Maar det is al lang geleje. Det vastelaovesblood sjtruimt dan ouch al generasies door ós femilie.

Ich zit in de brugklas van de Broekhin en doon dao de kansklas VMBO T/ HAVO. Hel wirke dus en det hoeswerk is ouch neet alles. Mer ja, ich wil oojt advekaot waere, dus ich mót der get veur euver höbbe.

Ich bön eine grote fen en supporter van PSV, det is mien klup. Same mit mien paettante Camilla en miene grote naef Roy bezeuk ich regelmaotig eine wedsjtried. Pap en mien breurke zeen veur Ajax, mer det is nieks, det is mer ein poetsmiddel. Miene Opa Piet is veur Feyenoord, dus geer kint uch waal veursjtelle wie gezellig det bie ós kin zeen op eine zunjigmiddig.

Mien grootste passie en hobbie is voetballe. Dit doon ich bie SVC 2000 in de JO13-1G (D1). Dao sjpeel ich links-veur en zorg d’r veur det de sjpits kint skore. Miene traener is miene grote naef Roy. Miene grote vrundj en veurbeeld.

Game doon ich ouch gaer. Fifa sjpele net zo lang toet det de kontroller door de kamer vluug en mam ‘t zat is. Same mit mien vrunj sjpele veer gaer dit sjpel. Mer ‘t leefste voetbal ich mit mien vrunj bie SVC en make veer Neel ónveilig.

Netuurlik gaon ich dit sjpeel neet allein sjpele, mer same mit mien twee geweldige adjudante. Mien beste vrunj, Sebastiaan Hanssen dae geer missjien van veurig jaor kint es adjudant van jeugprins Mees I, is eine ervaringsdeskundige, en Minic Colenbrander wobie ich al miene hele sjooltied in de klas zit. Same voetballe veer ouch in de JO13-1G .  Minic haet eine döbbelgenger: zien tweelingbroor Marik. Mien mam kint se nao al die jaore nog sjteeds neet oetein haje. Dees twee men zeen mien sjteun en toeverlaot.

Ich bön super greuts det ich dit jaor de jeugprins van de Katers oet Neel moog zeen. Ich hoofde der dan ouch neet lang euver nao te dinke toen Marcel mich vroog.

Ich gaon der same mit mien adjudante ein super sjoon sezoen van make en eine vastelaovend óm noojt te vergaete!

En det doon ich ónger miene liefsjpreuk:

Alaaf, vastelaovend is gaaf!

Woonplaats Neel
Laeftied 1×11+1 jaor
Gewich presies tegooj
Lingte 1.58m
Sjoonmaot 39
Sjterrebeeld Sjteinboek
Opleijing Kansklas T/H BC Broekhin
Waat wil se later waere Det zeen veer dan waal
Femilietrekskes eigewies, net zo wie miene pap
Diene biejnaam Renske
Vereniging SVC 2000
Hobbies Voetballe en game
Hoesdere Gein, moog neet van miene pap
‘t Lekkerste aete Pizza,sjwarma
‘t Neet lekkerste aete boeremoos mit wórs
Favoriete drank Ice tea
Favoriet fekansielandj Italië
Sjoonste TeeVee Program Sjtudio sjport en ekspedisie Robinson
Sjoonste Meziek Rap, Martin Garrix en vastelaovesmeziek
Sjoonste vastelaovesleedje Big Benny, Leever te diek in de kist…..
Bang veur Ich bön nörges bang veur
Ich druim döks van Det ich oppe wage sjtaon
Beste eigesjap Bön altied oppe tied
Sjlechte eigesjap Eigewies en óngedöldig
Höb resjpek veur Ederein
Höb ein haekel aan Es emes te laat kump
Mót lache óm mien breurke
Ich erger mich waal ins aan miense die ruzie make
Waat win se dich eine sjone vastelaovend
Waat wil se nog ins euverdoon De fekansie van 2017
Vastelaovend is…? Alaaf, vastelaovend is gaaf
Waat waas dien rejaksie wie se
gevraog waerdes om dees
funksie te vervulle Ich wis metein det ich het wól, super gaaf!