Daagbook

Zunjig 8 jannewarie: ‘t oetrope

Same mit mien adjus Sebas en Koen, ware veer nogal gesjpanne. Al mien vrunj vroge mich of ich de nuje prins waas mer ich zei natuurlik van neet. Óm 3 oer lepe Sebastiaan, Koen en ich via de kefee boete óm nao ‘t zaelke achter de buun óm ós dao óm te kleije. Det verleep eigelik vlekkeloós mer de sjpanning leep natuurlijk beheurlik op. In de zaal waas inmiddels de oetroop èk al begós; aad jeugprins Jort 1 veurde achter ein sjerm ein sjaduwsjpel op wo in d’r hints waerde gegaeve euver de hobbies van de nuje prins en zien adjudante. Mit sjpannende meziek kwame veer vanoet de kefee in witte pakke en maskers onherkinbaar nao veure. ‘t Waas efkes vraemp det d’r al 3 man klaor sjtinge achter ‘t witte sjerm (de prins en adju’s van veurig jaor) ; mit get trekke en duje höbbe veer die toen van de buun aafgezat en zeen veer zelf klaor gaon sjtaon óm door t witte papier te sjringe. Toen d’r in de meziek ‘laot dich kieke’ waerde gezonge, sjpronge veer d’r door. De confetti ging door de loch en veer höbbe de res van de middig ‘n groot feesje gebouwd. Vet gaaf.

Ich zègk: ‘Neet mauwe, feesje bouwe’!

 

Zondig 15 janewaari: van de morge toet de aovend

Zondigmorge; jaomer genóg waerde ich nao ‘n paar dage griep wakker mit nog sjteeds get koppien en boekpien mer wiejer veulde ich mich waal oké.

’t Belaofde ‘ne sjieke daag te waere. ’s Morges sjting de Technische Kemissie van de Katers aan de deur ómdet ze mien Prinsebord in de haof kwame zètte zodet ederein noe wit wo de Kater Jeugprins woont.

Daonao verzamele op Plein 99 om de Klassjeneel te verkoupe. Es prins ging ich natuurlik ouch mit mer jaomer genóg veulde ich mich steeds kranker waere. Pap is mich dan ouch eerder kómme haole zodet ich nog efkes kós oetröste veurdet de hele jeugraod en JPK bie ós breudjes knak kwame aete. ’t Waas ‘ne gezellige boel en d’r zeen flink get breudjes nao binne gewirk, he Jort en Lowieke 😉

Toen waas ’t tied om nao de sjtad te gaon, ’t oetrope van de jeugprins van de Uul. Sjpannend want ich haaj waal ‘n vermoede waem ’t zol waere en det waas ouch zo. Mien vrunj Prins Niek (de eerste) mit adjudante Krijn en Steef. Waat waas ich gaer langer gebleve om mit ederein same de boel op sjtelte te zitte maar ich veulde mich zo krank det ich nao ein klein half uurke weer nao hoes bön gegaon. Ich bön ’t bed in gedaoke en dao neet meer oetgekómme toet maondigaovend.

Daodoor jaomer genóg ouch de receptie van Jeugprins Kyro 1 van de Haofgengers mótte misse. Gelukkig höbbe Sebas, Koen en de JPK d’r veur gezorgd et ’t waal nog een sjiek optraeje is gewore. Maar jonges ich belaof uch det veer d’r same op een anger moment opnuuj ‘n feesje van make!

Belaof = belaof!

Want………. Neet mauwe, feesje bouwe

 

Zunjig 29 januari

Ich waerde wakker en had metein heel väöl zin in deze daag want deze middig waas d’r receptie van Niek I. Ich had zien oetrope helaas mótte misse ómdet ich krank waas en daoróm had ich des te meer zin in zien receptie. En veur de eerste keer same mit Prins Roel II op sjtap; dao had ich ouch waal zin in.

Bie ’t Dörp waas weer aafgesjpraoke óm te verzamele en daonao mit z’n alle door nao ’t Witte Kirkske. Waat waas ’t dao drök, sjiek óm te zeen.

‘n Sjtrakke planning zorgde d’r veur det veer al metein aan de buurt ware. Dus de JPK begós ’t Neel blief Neel te sjpele en toen trokke veer nao veure.

Same mit Niek I, en alle adju’s, sjting ich op ’t podium terwiel Erik Obsjtals ‘t waord noom. Hae maakte d’r ein sjoon verhaol van en had ouch ‘n prachtig kedoo veur Niek I, ‘n houte Prinsemuts mit dao op ziene naam en oeteraard kreeg d’r ouch mien prinsemedalie en de angere kedo’s. Veer höbbe ouch ós leedje kinne bringe en daonao traoje veer in sjtiel aaf ónger de klanke van de JPK.

Ómdet veer wiejer nieks op de planning hadde kóste veer lekker lang blieve en höbbe veer same nog väöl lol gemaak.

Ter aafsjloeting noch lekker pizza gegaete en toen waas de daag toch ech veurbie…

Good oetröste dees waek want volgende week ‘n vol programma mit allemaol kei leuke dinge,

Noe zin in!

 

’t Eerste wiekend van februari,

Zoooo det belaofde ‘n drök weekend te waere, ‘t drökste toet noe toe. Det begós al op vriedigaovend, de bóntje aovend. Dao mochte Koen, Sebas en ich haer óm ós leedje te doon. Toen v’r op de buun sjtinge höbbe veer eers ein minuut sjtilte gehaaje veur Peter Maessen, dae väöl haet beteikend veur de Katers. Det waas ‘n indrökwekkend moment.

Mer daonao ging de aovend toch ech van sjtart, veer mochte ós leedje doon en de hele zaal deej vrolik mit. Toen v’r klaor ware mochten veer ouch nog effe genete van de show. Later z’n veer nao ’t kefee gegaon en höb ich same mit Prins Roel II op de biljaar gedans en gesjpronge op de meziek van de prinsekepel. Waat waas det sjiek, veur höbbe dao ein gezellig feesje van gemaak. Later es gepland dus pas nao hoes en toen metein ’t bed in.

Ouch zaoterdig belaofde eine leuke daag te waere want v’r ginge nao SVC ’veur ‘t oetrope van de nuje prins. Dao höb ich gooj herinneringe aan J.

De verrassing waas groot toen Prinses Amy waerde oetgerope. Amy is ein van mien teamsjpelers en zien secondante Arwin ouch. Is det neet gaaf…. D’r ware väöl angere prinse ( Koelbertus, Hoafgengers, Kits-Uule) en same höbbe veer flink gedans en gesjpronge. En ouch dao moch ich mien leedje doon.

Dae aovend höb ich effe lekker tv gekeke terwiel mien zusje noe nao de bóntje aovend moch óm dao häör leedje te doon mit ‘Van Alles Get’.

En toen kwaam de zunjig; eine drukke, sjieke daag. ’s Morges ginge veer al oppe tied nao Ool want dao waas RTV Remunj óm opnames te make veur Vastelaovend Same. Einmaol dao bleek dat eine haop vereniginge dao ware die allemaol geïnterviewd waerde en eventueel häör leedje mochte doon. Ouch veer mochte det. Same mit ozze Prins Roel II mochte veer get vertelle en toen allemaol same mien leedje gedaon. Ech get óm trots op te z’n. Toen veer dao klaor waere móste veer ós sjpoje óm weer oppe tied in Neel te zeen. Want dao sjtinge de jonges en maedjes van ‘Van Alles Get’ en de ‘Neelder Meiden’ klaor óm mit ein grote touringcar nao Eygelshove te gaon, nao de finale van het KVL. Waat waas det sjpannend, ze ware allemaol waal ‘n bietje zenuwachtig. Mer dao waas mit ’t optraeje nieks van te zeen. De optraejes ware super good en alletwee z’n ze op de veerde plaats geëindig! Heel good gedaon!

In de bus trök höbbe veer de meziek lekker hel gezat en flink lol getrap. Toen nog efkes nao de Sjter want dao waas net de letste bontje middig aafgeloupe. En ouch dao mochte veer nog eine keer op de biljaar ós leedje doon.

Waat waas dit ein FANTASTISCH wiekend! Allein mer kei sjieke uitjes, allein mer kei sjieke miense en allein mer kei blieje gezichte. Zo heurt vastelaovend te zeen…..!

“Neet mauwe, feesje bouwe”