Zaoterdig 23 fibberwari mit „Sjloetingstied“ Zaal de Ster
Prins Robin I van VV de Katers neudig uch oet
veur ‘ne geweldige aovend !
Nao ‘t biewone van de Vastelaovesmès óm 18.00 oer in de Laurentiuskirk make Prins Robin I mit zien Katergevolg zich óp veur ‘ne gezellige feesaovend dae al ‘n aantal jaor bekind sjteit ónger de naam „de Prins neudig oet“.
„De Prins neudig oet“ zal net zó-es verleeje jaor plaatsvinje de zaoterdig veur ‘t Vastelaovesweekend, óp 23 fibberwari en de aovend zal róndj 20.30 oer in ’t Katerpelies, Zaal de Sjter, van sjtart gaon. Deze ‚Prins neudig oet‘ is ‘ne aovend veur Katerléje en gaste die door de Nuje Prins oetgeneudig waere.
De meziek waert verzorg door feesband “Sjloetingstied” , die ós ein “100% daak d’r aaf garantie” gaeve en netuurlik ós eige Prinsekepel.
De vastelaovend begint väölbelaovend biej de Katers oet Neel!! Mit anger wäört, dit fees moog geer neet misse!
Moch geer gein Katerlid zin of gein oetneudiging höbbe ontvange en geer wilt deze geweldige feesaovond neet misse, dan kint geer ’t beste ein mailtje sjture nao info@dekaters.nl Dit jaor zal d’r gein sjpeciaal thema óp deze aovend zin, waal verwach VV de Katers det de bezeukers sjoon verkleid aan deze aovend deilnaeme. Veer kieke mit sjpanning oet nao de väöle leeje en geneudigde die ongetwiefeld in prachtige pekskes de aovend toet ‘n sukses zalle make. VV De Katers zal ouch de jubilarisse gaon huldige, te wete: Robbie Gorts en Remco Keuren (1×11) en Jos en Susanne Even (2×11). In de loup van de aovend zalle de gaste zó-wie geweunlik nog kinne geneete van ‘n zeer sjmakelik hepke, aangebaoje door VV de Katers. Veer haope det al ós léje en de geneudigde gevolg gaeve aan de “Oetneudiging van de Prins”. (foto Prins: Hans Sweegers)
