Prins Robin I de Groot
de nuje Prins van de Katers oet Neel
Nao maonje van wachte waas ‘t zaoterdig 12 jannewarie 2019 dan eindelik zowied: ‘t oetrope van de nuje Katerprins bie Zaal de Ster. Veurdet ‘t echter zowied waas, waerde eers ziene veurgenger Prins Olaf I Metten opgenaomme in SJNAPS. Naodet hae de proeve van bekwaamheid succesvol haaj aafgelag, waerde hae door zijn mede-aadprinse mitgenomme en waas de buun vrie veur de oetroopact van de nuje. De zaal waas inmiddels knàtsjvól en de sjpanning begós flink te sjteige ónger de toesjouwers. De luuj sjtinge toet op de vriegemaakde buun en zelfs achter de bar. D’r waerde de zaal róndjgekeke óm te zeen of d’r bekinde ware en of d’r miense plotseling ware verdwene. Vors Wil deilde de zaal mit, det d’r dit jaor gein filmke zól volge, mer det de Prins zónger poespas van achteroet de zaal nao ’de buun zól komme, mer dan uiteraard waal volledig incognito. Zo waas ‘t dan ouch en nao inkele rundjes wurme door de zaal noom de Nuje zien plaats in naeve Vórs Wil óm te waere geïnstalleerd. Bie ‘t onthulle begós de meziek te sjpele en klonke hie en dao krete van herkinning en verbazing. Dao sjting dan nuje de Katerprins: Robin I de Groot!
Volges eige zègke haaj hae dae aovend geine las van zenuwe, maar woor hae waal opgeluch det hae noe eindelik zichzelf bekind moch make es de nuje Prins. Naodet hae door Vors Wil waas veurzeen van zien waardighede, kreeg de Prins de microfoon en sjtelde hae eers zichzellef veur en reep hae daonao zien adjudante bie zich óp ‘t podium. De Prins zal dit jaor waere geassisteerd door Lars Heuvelmans, Roel Hendriks en Vincent Theunissen. Hae woont same met zien vriendin Mieke en zien twee zeunkes Krijn en Chris en hóndj Max. In ‘t dagelikse laeve is hae directeur bie Groba, ein bedrief det mesjienes maak veur verwirking van kees. In ziene vrieje tied vaart hae gaer mit ziene boot, kiek hae nao series óp Netflix en duit hae aan tennis. Oetgaon mit vrunj en dan lekker aete en borrele is ouch get waat hae gaer duit. Same mit zien adjudante zal hae euver ‘t Katerriek gaon regere met ziene liefsjpreuk: “Ich kees veur Vastelaovend!”.
De aovend van ’t oetrope kreeg extra glans door optraejes van de Prinsekepel Neel, DJ Cropy, Henk & Ton en Björn & Mieke. Mit dit oetrope waas metein dudelik det de Katers dit Vastelaovessezoen nog heel väöl sjoons te wachte sjteit!
Meer laeze euver de prins en zien adjudanten? Klik hiej
