Eine daag naodet veer wete of Neel “besjerming” geit kriege van MK De Kets, is ‘t tied veur de tweede activiteit in ‘t nog prille sezoen van 2017-2018: de Neelder Leedjesmatinee. Op zunjig 12 november zalle 12 nummers de muzikale degens kruutse in de sjlaag om de titel van “Neelder Sjlager 2018”. In de veurgaonde editie woor ut ‘ne sjpannende sjtrijd tusse Amber en Britt, Op Good Gelök en het duo Blindj Mit, wobiej de letsgeneumde es winnaar oet de bus kwoom mit ‘t nummer “Waat doon veer ós aan?”. Biej de jeug woor “Van alles get” de sjterkste mit “Mit Vastelaovend Moog Alles”. Waem geit in de vootsjpaore traeje van dees gladiatoren en zal de muzikale gesjiedenis van Neel gaon verrieke?
Kóm op 12 november óm 14.11 oer nao Zaal De Ster óm dit prachtige evenement zelf mit te maken en gaef ut sezoen eine sjoone sjtart!
