Op zóndigmiddig 5 jannewarie vónj onger väöl publieke belangsjtelling ‘t Jeugprinsoetrope plaats in Zaal “’t Dörp”.
Róndj 14.11 oer begos de oetroop-act veur de nuje Jeugprins.
Nao ‘ne toer door de zaal, noom de toekomstige heerser euver de Neelder Katerjeug plaats achter de dook. Vors Wil, Prins Robin I en nemes minder es Ronald Vorage veurde ‘n discussie of ‘t neet ins tied mòs waere veur ‘n prinses. Woor det messjien ‘ne hint veur ’t oetrope van de grote Prins? Veer gaon ‘t zeen…
Eindelik woor ‘t dan zowiët. Nemes minder es Loewieke I van Cruchten kwoom teveursjien es Jeugprins van de Katers.
Loewieke zal veur de Neelder miense geine onbekinde zin. Hae is immers zoon van aad Prins Roel I en breurke van aad Jeugprins Pieter-Raoul. Vanaaf noe moog hae echter bepaole wie ziene Vastelaovend zal kómme oet te zeen. Same mit Isa Vorage en Chris de Groot es adjudante zal dit prinselikke trio de Katers vertaegewäördige op de diverse activiteite. Same prizzenteerde zie ouch nog häör leedje womit zie deze vastelaovend besjlis meinige zaal ’t ongerstebaove gaon kriege.
In ‘t dageliks laeve geit Loewieke nao de basissjool in Leeve en is hae lid van de fanfaar in Leeve, träöt hae bie de JPK en voetbalt hae bie SVC 2000. Loewieke I zal, gaon regere euver ‘t riek van alle Ketjes en Kaeterkes ónger ziene liefsjpreuk:
Neet dinke, maar doon!
(foto Hans Sweegers, Heel)
