De crisis is veurbie. Vanaaf noe sjmiete de Grieke weer mit de pieke!
’n Speciaal delegatie kump op de zondig van d’nellefdevand’nellefde gans oet Griekelandj vanaaf 14:00oer op ’t Betjesplein heel Neel hertelik danke veur alle sjteun van de aafgeloupe jaore door heel weinig diek en veural door heel väöl dun. Dankzij de inzamelactie op Gyros 555 (5*111) höbbe ze alles weer oppe rit.
Ruumhertig en joviaal kómme ze daoróm de vruntjsap mit de Katers bezegele mit ’n groot Grieks fees mit zang, dans en delicatessen. Aafgezante Zubku Allepannelos, Maakmich Demekanodoos, Alexander Pasnogopgebos en Miem Laotdrélos, ouch bekind es ‘t Kwartetje Hellenique, sjete dan same mit de Neelder Garde ’t nuuj sezoen in van de Vastelaovend, ónger auspiciën van ’t voltallig Katergezelsjap. En det ónger ’t motto: ‘Veer sjmiete de Vastelaovend in.’
En dan nog is ’t neet op, want aansjloetend sjteit bie de Sjter in de zaal toet in de late uurkes ’n keur van artieste oppe buun, wo-ónger de Autarky Bress Bend, Op Good Gelök, de Prinsekepel van de Katers en ’t fees-combo ónger leiding van Hub Boeste.
