Op zaoterdig 11 november zól óm 18:11u. ‘n nuuj sezoen van de Neelder Vastelaovend aanvange – tenminste es ‘t allemaol doorgeit! De leste waeke sirkelere berichte in de media en op internet det Motorklup “De Kets” zich in Neel wil vestige. De groep wil Neel ‘besjerming’ aanbeje taege de aangekondigde verangeringe in de Neelder Vastelaovend – in ruul veur väöl vater beer.
SJNAPS, de Serejeuze Neelder Aad Prinse Sociëteit reup daaróm de Neelder bevolking op om in grote getale richting Betjesplein te komme om d’rveur te zorge det deze ongure groep geine voet ane grondj krieg in Neel. Daobie is de hulp van de Neelder Garde ingeropen om de Neelder Vastelaovend desnoods gewaopender handj te besjerme. Ouch hoof nemes hónger te lieje – veur ’n volle maag waert gezorgd..
Nao de äöpening op ‘t Betjesplein zól ‘t program róndj 19:00u in kefee-zaal ‘De Sjter’ in de Raodhoessjtraot waere voortgezat mit louter Neelder artieste, wo-ónger ‘t illustere duo ‘Mutti & Sohn”.
Kóm nao Neel!
